Um arbeiðstíðin er 180 dagar ella minni

Persónar, ið hava inntøku í Føroyum uttan at búgva her í einum tíðarskeiði, sum er 180 dagar ella minni í fylgjandi 12 mánaðir, eru avmarkað skattskyldigir. T.e., at teir rinda skatt í Føroyum av teirri inntøku, sum teir tjena her; men eru annars skattskyldigir í heimlandinum. Inntøka kann vera løn, ágóðar, eftirløn ella samsýning fyri arbeiði, sum gjørt er í Føroyum.

Løntakarar, ið eru avmarkað skattskyldigir, rinda 42% í skatti + 3% í arbeiðsmarknaðareftirløn (AM-gjaldi). Løntakarar, sum sigla við FAS-skipi ella bareboat-skipi, rinda 35% í skatti og einki í arbeiðsmarknaðareftirløn. Er ein avmarkað skattskyldigur, fær ein ikki barnafrádrátt og rentustuðul í Føroyum.

Um arbeiðstíðin er longri enn 180 dagar

Persónar, ið hava inntøku í Føroyum í einum tíðarskeiði, sum er longri enn 180 dagar í fylgjandi 12 mánaðir, eru fult skattskyldigir. T.e., at skattskyldiga inntøkan í Føroyum, og tað, sum ein hevur forvunnið aðrastaðni, skulu gevast upp til skattingar í Føroyum frá tí degi, ein er komin til landið.

Arbeiðir ein eitt longri tíðarskeið í Føroyum, skal ein eisini flyta bústað higar.

Reglurnar um arbeiðsloyvi í Føroyum eru ymiskar og valdast um, úr hvørjum landi, ein kemur.

Norðurlendingar

Borgarar úr Finnlandi, Svøríki, Noregi, Danmark, Íslandi og Grønlandi kunnu frítt koma til Føroya at arbeiða. Teimum nýtist ikki at søkja um arbeiðsloyvi áðrenn.

ES-borgarar

ES-borgarar úr øðrum londum enn Norðurlondum skulu søkja um arbeiðsloyvi til at kunna arbeiða í Føroyum. Umsóknarblað er at finna á heimasíðuni Ny i Danmark, sum er almenni internetportalurin hjá Útlendingastýrinum. Leinki til síðuna er at finna undir snarslóðum. Leita t.d. eftir "Færøerne" á síðuni og finn viðkomandi umsóknir.

Borgarar úr øðrum londum

Borgarar úr øðrum londum enn Norðurlondum og ES-londum skulu eisini søkja um arbeiðsloyvi. Umsóknin skal sendast til donsku sendistovuna í tí landi, haðan borgarin kemur. Tað er Udlændingeservice í Keypmannahavn, sum umsitur arbeiðsloyvini. Eisini hetta ber til at lesa meira um á heimasíðuni Ny i Danmark.

Tímalønt fáa frítíðarløn 2. mai. Fastlønt fáa 1,5% av lønini saman við apríl-lønini. Tað er umráðandi, at útlendingar, ið eiga frítíðarløn til góðar í Føroyum, ikki strika kontuna, hagar frítíðarpeningurin skal flytast, fyrr enn hann er komin á kontu.

Les meira um frítíðarløn undir snarslóðum.

Persónar, sum koma til Føroya at arbeiða, skulu hava p-tal fyri at fáa løn útgoldna. P-talið kann fáast frá TAKS. Síggj mannagongd og les meira um evnið við at trýsta á leinkið "P-tal og lønarútgjald" undir snarslóðum her á síðuni.

Verður flutt til Føroya í sambandi við tíðaravmarkað starv, og ein hevur fulla skattskyldu her, kann søkjast um undantak at rinda eftirlønargjald og ALS-gjald.

Treytir og umsóknir

Eftirlønargjald
Frítøka frá eftirlønargjaldi krevur fulla skattskylda, og standa skal beinleiðis í starvssáttmálanum, at starvið er tíðaravmarkað. Frítøka kann tá fáast í upp til 60 mánaðir samanlagt.

Søkt verður við at senda TAKS umsóknina ”Frítøka frá at rinda eftirlønargjald”. Hon er at finna undir snarslóðum her á síðuni. Avrit av starvssáttmálanum skal leggjast saman við. Best er at senda, áðrenn fyrsta lønin kemur á kontu, tí tá er skjótast at avgreiða umsóknina.

Lýkur ein krøvini, men kortini hevur goldið eftirlønargjald, kann søkjast um at fáa peningin aftur. Til tess brúkar ein umsóknina ”Endurrindan av eftirlønargjaldi”. Hon finst undir snarslóðum her á síðuni. Minst til at leggja avrit av starvssáttmálanum saman við.

ALS-gjald
Fyri at verða frítikin frá at rinda ALS-gjald, skal ein senda Arbeiðsloysisskipanini (ALS) eina umsókn saman við avriti av tíðaravmarkaða uppihalds- og arbeiðsloyvinum. Frítøka kann tá gevast fyri upp til 1 ár í senn.

Ring ella skriva til Arbeiðsloysisskipanina fyri at fáa vegleiðing um umsókn og treytir annars. Leinki til Arbeiðsloysisskipanina er at finna undir snarslóðum.

Útlendingastovan í Føroyum veit at vegleiða. Vitja heimasíðu teirra, ið kunnar á føroyskum og á enskum. Leinki er undir snarslóðum.