• Tú skalt hava fulla skattskyldu og fast tilhald í Føroyum.
• Tú skalt hava foreldramyndugleika yvir barninum ella hava tað búgvandi hjá tær.
• Barnið skal vera yngri enn 18 ár 1. januar tað skattaár, ið frádrátturin verður givin fyri.
• Barnið skal búgva í Føroyum ella hava varðveitt fulla skattskyldu her, um tað er í útbúgvingarørindum uttanlands.

Fevnir skattskyldan hjá tí, sum fær barnafrádráttin, ikki um eitt heilt álmanakkaár, verður frádrátturin minkaður lutfalsliga. Verður skattskyldan hjá barninum brotin mitt í einum álmanakkaári, verður frádráttur tó givin fyri alt árið.

Tekur barnavernd við umsorganini av barninum, fellur frádrátturin burtur.

Barnafrádráttur verður givin bæði í landsskatti og í kommunuskatti.

• Í landsskattinum veldst frádrátturin um aldurin á barninum. Er barnið yngri enn 7 ár, er frádrátturin 9.200 kr. um árið. Er barnið millum 7 og 17 ár, er frádrátturin 6.500 kr. um árið. Aldurin verður taldur 1. januar í tí álmanakkaári, sum frádrátturin verður givin.
• Í kommuskattinum er frádrátturin ymiskur frá kommunu til kommunu. Gev gætur, at frádrátturin verður ásettur eftir upphæddini hjá teirri kommunu, har ein búði 1. desember árið fyri, at frádrátturin verður givin.

Síggj upphæddirnar hjá ymsu kommununum undir snarslóðum: "Talva yvir kommunuskatt, kirkjuskatt og barnafrádrátt".

T.e., at fyri hvørja lønarútgjalding rindar tú minni í skatti, enn tú annars hevði skulað. Siga vit, at tú fært 12.000 krónur í barnafrádrátti um árið og fært løn eina ferð um mánaðin, so rindar tú hvønn mánað 1.000 krónur minni í skatti, enn um tú ikki fekst barnafrádrátt.

Á lønarseðlinum stendur tó einki upplýst um, at tú fært barnafrádrátt. Tú rindar bara tað minni í skatti. Samlaða barnafrádráttin í peningi sært tú í skattauppgerðini, sum tú fært sendandi eina ferð um árið fyrst í marsmánaði.

Tú eigur rætt til barnafrádrátt alt tað árið, sum barnið verður føtt

Er peningur eftir at gjalda, tá ið árið er liðið, verður restin útgoldin sum avlopsskattur árið eftir. Verður barnið t.d. føtt í apríl, verða januar, februar og mars útgoldnir sum avlopsskattur. Verður barnið føtt í august, er talan um januar-juli o.s.fr. Avlopsskattur verður útgoldin árið eftir, at barnið er føtt, vanliga í mars.

Um tú rindar minni í skatti, enn tú hevur rætt til í barnafrádrátti

Er skatturin hjá tær minni enn barnafrádrátturin, fært tú munin útgoldnan sum avlopsskatt árið eftir. Eigur tú t.d. at rinda 10.000 kr. í skatti og hevur rætt til 12.000 í barnafrádrátti, verður skatturin settur til 0, og 2.000 verða útgoldnar í avlopsskatti. Eigur tú at rinda 6.000 í skatti, verður skatturin settur til 0, og 6.000 verða goldnar í avlopsskatti o.s.fr. Avlopsskatturin verður vanliga útgoldin í seinna helmingi av mars. Skalt tú lata inn sjálvuppgávu, verður hann útgoldin eitt sindur seinni, ofta í apríl.

Barnafrádráttur og Børne- og ungeydelse

Barnafrádráttur er at líkna við tað, sum í Danmark verður kallað Børne- og ungeydelse. Hevur tú fingið hesa veiting niðri og ert komin til Føroya at búgva, skalt tú geva gætur, at barnafrádráttur verður ikki fluttur á kontu, soleiðis sum Børne- og ungeydelsen verður, men at tú í staðin rindar minni í skatti, soleiðis sum omanfyri er greitt frá.

Sum standard fær mamman frádráttin, um foreldrini eru ógift, og pápin, um tey eru gift. Hjá hjúnum, sum ikki eru sambúgvandi, fær tann hjúnafelagin, sum hevur børnini búgvandi, frádráttin frá fráflytingardegnum.

Reglurnar eru annars, at barnafrádrátturin fellur til tann, sum hevur foreldramyndugleikan yvir barninum. Er talan um felags foreldramyndugleika, antin tí foreldrini eru gift ella hava avtalað slíkan myndugleika, kunnu tey gera av sínámillum, hvør skal hava frádráttin. Kunnu foreldrini ikki semjast, kann TAKS taka avgerð við grundarlagi í einari samveruresolutión.

At enda kann barnafrádrátturin eisini verða latin persóni, sum hevur barnið búgvandi uttan at hava foreldramyndugleikan, um tann, sum hevur foreldramyndugleikan, ikki eisini hevur barnið búgvandi. Býr barnið hjá foreldrunum upp á skift, men bert annað hevur foreldramyndugleikan, verður barnafrádrátturin ikki býttur millum foreldrini, men verður verandi hjá tí, sum hevur foreldramyndugleikan.

Vilja persónar, sum lúka treytirnar fyri at fáa barnafrádrátt, flyta hann frá einum til hin, ella vilja teir býta hann sínámillum, skulu teir senda TAKS eitt fyribilsskattaskrásetingarskjal.

Hjáløgd skal vera ein skrivlig avtala, har báðir partar hava skrivað undir upp á flytingina ella býtið. Býtið kann uppgevast sum dagar av árinum ella sum lutfall í brøki ella prosentum.

Fyribilsskattaskrásetingarskjalið er at finna undir snarslóðum. Har kanst tú eisini lesa meira um fyribilsskattaskráseting generelt.

Send skjalið saman við skrivligu avtaluni til TAKS, Postboks 2151, 110 Tórshavn ella til taks@taks.fo,

Best er at avgreiða hetta fyrst í skattaárinum.

Um barnið er yngri enn 18 ár og flytur uttanlands í útbúgvingarørindum, so kanst tú sum foreldur varðveita barnafrádráttin, um barnið søkir um at varðveita fulla skattskyldu í Føroyum.

Søkt verður á Borgaraglugganum

Stendur barnið ikki á skattauppgerðini, kanst tú boða okkum frá við at senda eitt teldubræv til TAKS á Mínboks ella eitt vanligt bræv til TAKS, Postboks 2151, 110 Tórshavn. Minst til at upplýsa p-talið hjá barninum.

Boða okkum frá vit at ringja til kundatænastu okkara á telefon 35 26 00 mánadag til hósdag millum 10 og 15 ella við at senda eitt teldubræv til taks@taks.fo.

Ring til kundatænastu okkara á telefon 35 26 00 mánadag til hósdag millum 10 og 15 ella send eitt teldubræv til taks@taks.fo. Vit vegleiða fegin.