Føroyfrádrátturin er í tveimum.

Fyrri partur, sum eisini verður kallaður føroyafrádráttur, kann skifta nakað í krónum. Í 2024 er hann 49.700 krónur. Á donskum verður hesin partur av frádráttinum kallaður gæstestuderendefradrag ella bara studerendefradrag. Seinni partur, sum verður kallaður ríkisfelagsskapsfrádrátturin, á donskum rigsfællesskabsfradraget, er 36.000 krónur og er tann sami hvørt ár.

Samlað geva nevndu upphæddir føroyafrádráttin. Tað er, um man lesur fult ár.

Lesur man part av einum ári, minkar frádrátturin samsvarandi. Er tað til dømis fyrsta árið, og man byrjar í september, verður frádrátturin 4/12 av fullari upphædd, tí so lesur man 4 mánaðir av 12.

8 prosent skulu gjaldast í AMB (Arbejdsmarkedsbidrag) av allari arbeiðsinntøkuni.

• Man skal vera í Danmark í lestrarørindum.
• Man skal hava búð í Føroyum, áðrenn man flutti til niður.
• Man skal ikki hava førleikagevandi útbúgving frammanundan.
• Man skal ikki hava verið niðri í meira enn seks mánaðir áðrenn lestrarbyrjan.

Upp í seks mánaða tíðarskeiðið verður ikki roknað tann tíð, sum verður nýtt í sambandi við fyrireikandi skeið, sum útbúgvingarstovnur krevur fyri at kunna byrja lesnaðin. Henda tíð kann tó vara í mesta lagi eitt ár.

Søkja hjún inn á útbúgvingarstovn, og bert annað verður upptikið, verður seks mánaða reglan tikin úr gildi, hvat viðvíkir hinum hjúnafelaganum, tó í mesta lagi í tvey ár.

Gev gætur, at føroyafrádráttur kann bert nýtast til arbeiðsinntøku, og man rindar vanligan skatt av SU. Man hevur rætt til føroyafrádrátt, so leingi man lesur, tó í mesta lagi ásetta lestrartíð + tvey ár.

Fyri at søkja um føroyafrádrátt skal man venda sær til uttanlandsdeildina á skattasentrinum, har man býr. Har skal man boða frá:

• at man er føroyingur undir útbúgving,
• at man hevur inntøku, sum man søkir føroyafrádrátt av,
• at man ætlar sær heim til Føroya eftir loknan lestur.

Tað er umráðandi at kunna vísa lestrarkort, lærusáttmála ella annað skjalprógv fyri, at man er lesandi.

Finn meirlesnað á heimasíðuni hjá ráðgevingini fyri føroyingar í Danmark ella spyr ráðgevingina beinleiðis. Hon veit.

Leinki til síðuna við lesnaði og kontaktupplýsingum er undir snarslóðum.