Ein sjálvuppgáva er eitt oyðublað, sum man skal lata inn til TAKS, um man leigar út, er sjálvstøðugt vinnurekandi ella hevur uttanlandsinntøku, herundir útlendska eftirløn. Í oyðublaðnum upplýsir man inntøku og møguligan frádrátt síðsta ár, og út frá tí roknar TAKS skattin hjá einum tað árið.

Hevur man fingið eina skattauppgerð, sum skal rættast – kanska tí at TAKS ikki veit av, at man hevur onkra av omanfyrinevndu inntøkum – so ger man tað eisini við eini sjálvuppgávu.

Um man leigar út

Man leigar út, tá man letur onkrum eitt høli at brúka fyri pening ella peningsvirði. Leigast kann út við roknskapi ella bruttuskatti.

• Leigar man út við roknskapi, skal man lata hann inn saman við sjálvuppgávuni á Borgaraglugganum. Har tastar man úrslitið av roknskapinum inn og viðheftir útfyltan roknskaparleist fyri húsaleigu.
• Leigar man út við bruttoskatti, viðheftir man ikki roknskap, men tastar beinleiðis inn á Borgaragluggan undir skattur > húsaleiga
• Les um útleigu
• Les um roknskap

Um man hevur uttanlandsinntøku

Man hevur uttanlandsinntøku, um man fær inntøku ella eftirløn aðrastaðni enn úr Føroyum, samstundis sum man hevur fulla skattskyldu her.

• Saman við sjálvuppgávuni skal man lata inn viðkomandi fylgiskjøl
• Fylgiskjøl skulu tastast inn á Borgaraglugganum eins og sjálvuppgávan
• Les um uttanlandsinntøku

Um man er sjálvstøðugt vinnurekandi

Man er sjálvstøðugt vinnurekandi, um man hevur eitt einstaklingsvirki ella eitt íognarfelag ella hevur vinnuligt virksemi aðramáta.

• Saman við sjálvuppgávuni skal man lata inn roknskap
• Roknskapurin skal latast inn á Borgaraglugganum eins og sjálvuppgávan
• Les um roknskap

Til ber ikki við einum orði at siga, um eitt virksemi er vinnuligt ella ikki. Metast má um, har hugt til dømis verður eftir:

• um høvuðsendamálið er at tjena pengar,
• um eitt hall bara kemst av t.d. byrjanartrupulleikum,
• um virksemið fer at geva avlop innan ávísa tíð í mun til íløgurnar,
• um man hevur kannað, um virksemið ber seg, áðrenn man fór í gongd,
• um rakstrarhátturin er vanligur fyri virksemið,
• um amboðini verða brúkt privat, og í hvønn mun,
• um man hevur nakrar fakligar fortreytir fyri at reka virksemið,
• um virksemið møguliga kundi verið selt øðrum til vinnuligan rakstur.

Einki punkt avger spurningin einsamalt.

Rita inn og vel sjálvuppgávan 2024 > fyll út sjálvuppgávu.

Ber av serligum orsøkum ikki til at nýta Borgaragluggan, lat tá inn við oyðublaðnum Sjálvuppgáva 2024 (PDF). Gev tó gætur, at skalt tú lata inn roknskap, so má sjálvuppgávan latast inn á Borgaraglugganum. Ivast tú í onkrum, ring til kundatænastu okkara á 35 26 00 mánadag til hósdag millum 10 og 15 ella skriva til taks@taks.fo.

Fortel meira um Borgaragluggan

Klikk og hygg á taks.fo/meira-um-borgaragluggan.

Tað kann geva sekt og meirskatt at lata inn ov seint og ikki at taka alla inntøku við. Hetta er sambært §§ 100 og 139 í skattalógini.

Søkjast kann um longda innlatingarfreist

Serlig orsøk skal vera, eitt nú sjúka, og man skal ikki skylda aðrar skattauppgerðir. Send skrivliga umsókn til TAKS, Postboks 2151, 110 Tórshavn ella til taks@taks.fo.

Umsóknarfreistin er 29. apríl 2024.

Gev viðkomandi eina fulltrú til at nýta tín Borgaraglugga. Tú kanst geva hana á Borgaraglugganum og við brævi.

Á Borgaraglugganum

• Rita inn og gev fulltrúina undir grundupplýsingar/fulltrúir > fulltrúir.
• Freistin er 1. mai.

Við brævi

• Heinta fulltrúina (PDF), fyll út og send.
• Freistin er 19. apríl, tá skal brævið vera framkomið. Fimm dagar kunnu ganga, áðrenn útborið verður, so send í góðari tíð.

Vita Vegleiðing at geva upp skatt (PDF).

Spyr eisini kundatænastu okkara

Ring 35 26 00 mánadag til hósdag millum 10 og 15 ella skriva til taks@taks.fo.