Lurta

Kringvarpsgjald

Kringvarpsgjald rinda vit fyri at hoyra útvarp og síggja sjónvarp hjá Kringvarpi Føroya. TAKS krevur inn gjaldið sambært kringvarpslógini.

Hvør rindar kringvarpsgjald?

Tað gera øll, sum eru 24 ár og eldri, og sum hava fulla skattskyldu í Føroyum. Skyldan at rinda tekur við mánaðin eftir 24 ára føðingardagin. Arbeiðsgevarar rinda eisini kringvarpsgjald. Tað kanst tú lesa um við at klikkja á "Kringvarpsgjald (arbeiðsgevarar)" undir snarslóðum.

Ert tú lesandi uttanlands?

So skalt tú ikki rinda kringvarpsgjald. Tað kann tó vera, at tú fært rokning sendandi, um tú ert skrásettur at búgva í Føroyum sambært Landsfólkayvirlitinum. Tá skalt tú venda tær til Kringvarpið og boða frá, at tú ert lesandi uttanlands. Kringvarpið tekur síðan støðu til, um tú skalt verða frítikin fyri at rinda og boðar í tí føri TAKS frá, at rokning ikki skal sendast.

Hvussu stórt er gjaldið?

Gjaldið er mánaðarligt og verður ásett eftir aldri:

  • Ert tú 24 ár og eldri, rindar tú 173 kr. um mánaðin. Gjaldið byrjar mánaðin eftir 24 ára føðingardagin.
  • Ert tú pensjonist, rindar tú 71 kr. um mánaðin. Gjaldið byrjar mánaðin eftir, at tú hevur rokkið fólkapensjónsaldur.
Hvussu verður gjaldið kravt inn?

Gjaldið verður innkravt soleiðis:

  • Fært tú løn ella skattafría veiting gjøgnum skattaskipanina, verður gjaldið tikið sjálvvirkandi av lønini/veitingini.
  • Fært tú lestrarstuðul, verður gjaldið tikið sjálvvirkandi av stuðlinum.
  • Fært tú ikki pening gjøgnum skattaskipanina, tí tú t.d. ert heimagangandi ella hevur B-inntøku, fært tú rokning sendandi hvønn mánað.