Barsilspengar
Við barsilspengum frá Barsilsskipanini er fíggjarliga møguligt hjá børnum og foreldrum at vera saman fyrstu tíðina í lívi barnsins.
Man søkir um barsilspengar við at senda Barsilsskipanini eina umsókn. Umsóknarblað er at finna á heimasíðuni hjá Barsilsskipanini, www.barsil.fo.
Gev gætur, at umsóknin skal vera inni í seinasta lagi 1 ár eftir barnsburð/ættleiðing.
Fyri at fáa barsilspengar, skal man:
- hava fastan bústað í Føroyum,
- hava fulla skattskyldu í Føroyum,
- vera um barnið í farloyvistíðini,
- hava havt A-inntøku seinastu 12 mánaðirnar, áðrenn farloyvið byrjar.
Útgjald
Støddin á útgjaldinum veldst um inntøkuna, ið man hevur havt frammanundan, men fer ikki upp um 30.000 krónur um mánaðin. Eftirløn verður løgd afturat, frítíðarløn verður tikin burturav.
Útgjaldið verður flutt á kontu mánaðarliga afturút, vanliga áðrenn mánaðarskiftið. Síggj útgjaldsdagar av barsilspengum í TAKS-kalendaranun undir snarslíðum her á síðuni.
Útgjaldstíð
Mamman hevur rætt til barsilspengar, frá tí at 4 vikur eru eftir til metta føðing, ella upp í 8 vikur áðrenn, um lækni mælir til tað. Eftir føðing fáast barsilspengar í 52 vikur. Hesa tíðina eigur mamman 14 og pápin ella sammóðirin 4 vikur, og síðan kunnu foreldrini býta 34 vikur sínámillum.
Vikurnar, sum eru til býtis, kunnu ikki nýtast fyrr enn 14 vikur eftir barnsburð. Til ber ikki at vera í barnsburðarfarloyvi í styttri enn 7 samanhangandi dagar í senn.
Barn, føtt áðrenn viku 32
Verður barnið føtt áðrenn viku 32, hækka vikurnar hjá foreldrunum við 8. Samlaða barnsburðarfarloyvið er tá 60 vikur.
Fleirburar
Er talan um fleirburar, hækka vikurnar hjá foreldrunum við 4. Samlaða barnsburðarfarloyvið er tá 56 vikur.
Ættleiðing
Foreldur, ið ættleiða barn, hava rætt til barsilspengar í til samans 52 vikur eftir móttøku av barninum. Harafturat hava tey bæði rætt til barsilspengar í upp til 4 vikur áðrenn móttøku av barni. Treytin er, at tey eru uttanlands eftir barninum hetta tíðarskeið.
Um man er singul
Er man singul, hevur man rætt til vikurnar hjá hinum foreldrinum afturat.
Um barn doyr
Barsilsfarloyvi
Doyr barn í móðurlívi hevur man rætt til barsilsfarloyvi, um lækni váttar, at talan er um barnsburð. Doyr barnið eftir føðing, hevur man rætt til barsilsfarloyvi.
Vikurnar eftir 14. viku kunnu tó bert nýtast av mammuni. Doyr barnið í hesum vikum, heldur barsilstíðin hjá pápanum ella sammóðurini uppat, um tey tá frammanundan hava brúkt sínar fýra vikur.
Verður ikki váttað, at talan er um barnsburð, hevur man ikki rætt til barsilsfarloyvi.
Barsilspengar
Doyr barn í móðurlívi ella í barsilstíðini er týdningarmikið at fráboða barsilsskipanini hetta beinanvegin, so at man ikki kemur í eftirstøðu við at fáa ov nógvar barsilspengar útgoldnar.
Doyr barnið í móðurlívi eftir 22. viku ella í barsilstíðini skal man seta teg í samband við Almannaverkið um møguligt endurgjald fyri mista arbeiðsinntøku sambært løgtingslóg um almannatrygd og tænastur, § 25, stk. 5.
B-inntøku hevur man, um man er sjálvstøðugt vinnurekandi, løntakari við b-inntøku ella hevur inntøku frá FAS. Tryggingin kostar 3.000 krónur um árið og skal hava verið í gildi samanhangandi í eitt ár, áðrenn man fær útgjald. Tekningarblað kann heintast á heimasíðuni hjá barsilsskipanini.
Arbeiðsgevari?
Vel "Barsilspengar, arbeiðsgevari" undir snarslóðum og les meira um tíni barsilsviðurskifti.
Vitja heimasíðuna hjá Barsilsskipanini, www.barsil.fo.