Lurta

Ferðastuðul

Ferðastuðul er fíggjarligt ískoyti til ferðing millum heim og arbeiði í eitt álmanakkaár. Søkjast skal um stuðulin, tá ið árið er úti, og søkjast skal talgilt.

Søkjast kann bert um stuðul fyri undanfarna ár

Tað merkir, at í 2025 kann man bara søkja um stuðul fyri 2024. Hetta er ein broyting í mun til fyrr, tá ið man eisini kundi søkja fyri eldri ár.

Broytingin stendur í § 4, stk. 2, í løgtingslóg um ferðastuðul. Løgtingið samtykti hana tann 20. desember 2024, og hon kom í gildi 1. januar 2025.

Aðrar stuðulstreytir

Fyri at fáa ferðastuðul skal man hava:

  • lønarinntøku,
  • útreiðslur av ferðingini,
  • bústað og fulla skattskyldu í Føroyum,
  • minst 30 km til og frá arbeiði í alt pr. dag.

Fram til 31. desember 2024 var minstafjarstøðan 20 km, men hevur síðan verið 30. Hetta sambært løgtingslóg um stuðul til ferðaútreiðslur.

Stuðul fæst fyri 220 arbeiðsdagar um árið.

Onnur viðurskifti

Dupult húsarhald

  • Hevur man dupult húsarhald, kann søkjast um stuðul millum leigustað og arbeiðsstað.

Fleiri arbeiðsgevarar

  • Hevur man fleiri arbeiðsgevarar eitt stað og fer heim ímillum, kann søkjast um stuðul til tvær ferðir aftur og fram pr. dag.
  • Hevur man fleiri arbeiðsgevarar ymisk støð, kann søkjast um stuðul til eina ferð aftur og fram til hvønn stað pr. dag.

Lærlingar og lesandi

  • Lærlingar hava rætt til ferðastuðul, eisini meðan teir eru í skúla. Tá skal saman við umsóknini leggjast váttan frá skúlanum um, at man hevur verið til undirvísing.
  • Lesandi hava ikki rætt til ferðastuðul. Í staðin er at søkja um skúlakort frá Strandfaraskipum Landsins.
Upphæddir

Upphæddir á stuðlinum eru eftir, um farið verður landvegis ella sjóvegis, herímillum gjøgnum undirsjóvartunlar. Landvegis verður roknað eftir kilometrum, sjóvegis eftir túratali.

Fram til 31. desember 2024 kundi eisini ferðast loftvegis, men við løgtingslóg um stuðul til ferðaútreiðslur varð hesin møguleiki strikaður.

Upphæddir fyri 2025

Landvegis, km í alt pr. dag

  •   30,0 –   49,9 km: 13,50 kr.
  •   50,0 –   63,9 km: 20,50 kr.
  •   64,0 – 101,9 km: 27,00 kr.
  • 102,0 – 123,9 km: 32,50 kr.
  • 124,0 – 145,9 km: 38,00 kr.
  • 146,0 – 167,9 km: 43,50 kr.
  • 168,0 – 189,9 km: 49,00 kr.
  • 190,0 – 211,9 km: 54,50 kr.
  • 212,0 km og meir: 60,00 kr.

Fram til 31. desember 2024 var minstafjarstøðan 20 km, men hevur síðan verið 30. Hetta sambært løgtingslóg um stuðul til ferðaútreiðslur. 

Sjóvegis, pr. túr

  • Suðuroyarleið:      15,90 kr.
  • Aðrar sjóleiðir:        7,45 kr.
  • Vágatunnil:              7,45 kr.
  • Norðoyatunnil:        7,45 kr.
  • Sandoyartunnil:      8,45 kr.
  • Eysturoyartunnil:    8,45 kr.

Sjóvegis kann søkjast til tveir túrar pr. dag.

Gev gætur við Eysturoyartunlinum og Brúnni um Streymin

Kann veljast ímillum Eysturoyartunnilin og Brúnna um Streymin til og frá arbeiði, skal søkjast fyri ta leið, ið brúkt verður. Brúkar man báðar, skal hvør leið gerast upp fyri seg. Koyrir man til dømis 200 dagar, helvt um helvt brúgv og tunnil, søkir man um 100 dagar fyri hvørja leið.

Umsóknir
  • Umsóknir um ferðastuðul skulu sendast TAKS talgilt á ferdastudul.taks.fo.
  • Søkt verður, tá ið árið er úti. Fyri 2024 verður soleiðis søkt í 2025.
  • Søkt verður fyri alt árið.

Stuðulin er á kontu mánakvøld

Nakrar vikur kunnu ganga, frá tí at umsóknin er send, til stuðulin er frammi.

Freistir

Freistin at søkja um ferðastuðul er 31. desember árið eftir stuðulsárið. Verður søkt um stuðul fyri 2024, er umsóknarfreistin 31. desember 2025.