Hægstirættur: dómur frá 31. mars 2015 (U.2015.2277, HR). Realitetur. Endamál. Vinningsbýti

Undanfarin rættur: Eystari landsrættur, dómur frá 7. november 2012, og Føroya rættur, dómur frá 16. juni 2011 (BS 1270/2010)

Evni: Søla av partabrøvum skattað sum vinningsbýti. Realitetur 

Lóg: Kapitalvinningsskattalógin § 1, stk. 2 og § 9, Lóg um toll- og skattafyrisiting § 25a og § 25 b

TAKS hevur tikið avgerð um, at søla av partabrøvum til útgevandi felag í 2003 er fjald útlutan av vinningsbýti, sum er skattskyldugt sambært kapitalvinningsskattalógini § 1, stk. 2.

Harumframt metir TAKS, at kr. 152,5 mió. (søluupphædd frádrigið apportinnskot) í samband við sølu av partabrøvum í P/F A til P/F B við eftirfylgjandi fusión í 2005/2006  skal skattast sum vinningsbýti.

Stevnandi ger galdandi, at søla av partabrøvum aftur til útgevandi felag í 2003 er skattafrí, at søla av partabrøvum í 2005 er skattafrí, og í øðrum lagi at broytingar sum TAKS hevur framt fyri 2003 og 2005 eru ógildugar.  

TAKS krevur frídøming.

Føroya Rættur kemur til tað niðurstøðu, at sølurnar í 2003 og 2005 báðar eru umfataðar av uppruna skiftisreglunum í kapitul 7 í kapitavinningsskattalógini. Og tá talan er um partabrøv seld seinni enn 3 ár eftir útvegan, skal vinningur sambært táverandi § 28 ikki takast við í uppgerð av skattskyldugari inntøku.

Tað var ikki gjørdur munur á, um talan var um sølu til triðja mann ella søla aftur til útgevandi felag áðrenn kapitalvinningsskattalógin kom í gildið. Tí verður ikki grundarlag fyri at viðgera søluna aftur til útgevandi felag í 2003 sum vinningsbýti.

Viðvíkjandi søluni í 2005 til eitt holdingfelag og eftirfylgjandi fusión, verður grundgivið við, at sølan í sær sjálvum ikki førir við sær, at stevnandi verður settur í skatt. Tað, at feløgini seinni verða løgd saman, hevur sjálvstøðugt sæð, heldur ikki við sær eitt tílíkt krav.  Tískil verður ikki mett, at grundarlag er fyri at skatta sølurnar sum krógvað vinningsbýti.

Landsrætturin:

Dómurin verður ankaður til landsrættin, sum eisini kemur til tað niðurstøðu, at partabrøv útvegað áðrenn 16. november 2001, seld aftur til útgevandi felag áðrenn 1. januar 2007, skulu viðgerast eftir  uppruna skiftisreglunum í kapitul 7.

Landsrætturin kemur eisini til tað niðurstøðu, at sølan og eftirfylgjandi samanlegging í 2005 heldur ikki kann roknast sum krógvað vinningsbýti, men sum tvær sjálvstøðugar handlingar, har søla av partabrøvum til holdingfelag verður roknað sum vanlig søla, samstundis sum eftirfylgjandi samanlegging broytir ikki uppá tað skattligu viðgerðina av søluni.

Hægstirættur:

TAKS krevur frídøming, tó hevur TAKS viðurkent, at sølan aftur til egið felag í 2003, er at meta sum skattafrí søla.

Stevndu krevja staðfesting.

Hægstirættur metir, í mun til tær ítøkiligu umstøðurnar, at stovnan av holdingfelag og sølan av partabrøvum til hetta, ikki hevur vinnuligt endamál, men at endamálið við handlingunum á hinari síðuni verður mett at hava verið, at fáa til vega pening, sum var upparbeiddur í tí upprundaliga holdingfelagnum, út til eigararnar uttan vinningsbýtisskatt.

Eftir eina heildarmeting, kemur Hægstirættur til ta niðurstøðu, at ein upphædd á kr. 152,5 mió, sum fall í part hjá eigarunum, ikki skal metast sum skattafríur søluvinningur, men í skattligum høpi skal metast sum vinningsbýti.

Hægstirættur gevur TAKS viðhald.