Kunngerð nr. 93 frá 2. juli 2013

um meirvirðisgjald av byggikostnaðinum av leigubústøðum

Við heimild í § 3 b, stk. 5 og § 33, stk. 2 í løgtingslóg nr. 136 frá 8. september 1992 um meirvirðisgjald, sum broytt við løgtingslóg nr. 57 frá 17. mai 2013, verður ásett:

§ 1. Henda kunngerð fevnir um meirvirðisgjald av byggikostnaði hjá teimum, sum byggja ella umbyggja bygningar til leigubústaðir.
Stk. 2. Tey, sum byggja ella umbyggja bygningar til leigubústaðir, skulu rinda meirvirðisgjald í landskassan av byggikostnaðinum samsvarandi galdandi reglum í løgtingslóg um meirvirðisgjald.

§ 2. Meirvirðisgjald av byggikostnaðinum kann eftir umsókn verða afturgoldið við 100% av inngangandi meirvirðisgjaldinum.

§ 3. Fíggjar- og kostnaðarætlanin av at byggja ella umbyggja bygningar til leigubústaðir skal vera góðkend av statsautoriseraðum, skrásettum ella løggildum grannskoðara. Grannskoðarin skal í góðkenning sínari av fíggjar- og kostnaðarætlanini staðfesta, hvussu stórur meirvirðisgjaldsparturin er,og at fígging er til alla byggiverkætlanina.

§ 4. Kommunan, har íløgan verður gjørd, skal vátta, at byggiverkætlanin er í samsvari við løgtingslóg um at byggja bygningar og reglur ásettar við heimild í lógini, og upplýsa hvussu nógvir leigubústaðir eru atkomiligir og kunnu nýtast av fólki í koyristóli.

§ 5. Meirvirðisgjaldið verður endurrindað eftir umsókn, sum verður send TAKS. Fyri at kunna góðkenna umsóknina skal TAKS, saman við umsóknini, hava góðkenning frá grannskoðara og váttan frá kommununi sbrt. §§ 3 og 4.

§ 6. TAKS fær tinglýst veðskuldarbræv, fyri rokning byggiharrans, í leigubústaðarverkætlanini svarandi til meirvirðisgjaldið sbrt. fíggjar- og kostnaðarætlanini.

§ 7. Tíðarfreist at lata inn uppgerðina er samsvarandi § 20, stk. 1 og 2 í løgtingslóg um meirvirðisgjald.

§ 8. Samlaða endurgjaldið kann ikki verða hægri enn meirvirðisgjaldið í fíggjar- og kostnaðarætlanini, sum er góðkend av grannskoðara, sbrt. § 3.

§ 9. Útleigari hevur skyldu at boða TAKS frá broytingum, sum føra við sær javning av avgjaldi, sbrt. § 3 b, stk. 3 í lógini, so sum at leigubústaðir ikki longur verða nýttir til leigubústað, og at leigubústaðir ikki eru bygdir í samsvari við treytirnar og reglurnar fyri at fáa meirvirðisgjaldið endurgoldið.

§ 10. Tann, ið við vilja ella av grovum ósketni brýtur §§ 3, 4 og 9, verður revsaður við sekt, uttan so at hann er skyldugur til strangari revsing sambært § 33, stk. 1 og 3 í lóg um meirvirðisgjald. Reglurnar í § 33, stk. 4 og § 34 í lógini eru eisini galdandi fyri brot á hesa kunngerð.

§ 11. Henda kunngerð kemur í gildi dagin eftir, at hon er kunngjørd, og hevur virknað frá 1. januar 2012 til 31. desember 2015.

Fíggjarmálaráðið, 2. juli 2013

Jørgen Niclasen (sign.)
landsstýrismaður
/ Bjarni Askham Bjarnason (sign.)