Kunngerð nr. 94 frá 21. desember 2004

um val av limum í kommunalu skattakærunevndirnar

Við heimild í § 12, stk. 2 og stk. 4 í løgtingslóg nr. 169 frá 30. desember 1997 um Toll- og Skattafyrisiting verður ásett:

§ 1. Tær 7 skattakærunevndirnar verða skipaðar av hesum kommunum:
Norðoya Øki fevnir um Fugloyar, Svínoyar, Viðareiðis, Hvannasunds, Klaksvíkar, Kunoyar og Húsa kommunur.
Eysturoyar Øki fevnir um Fuglafjarðar, Leirvíkar, Gøtu, Runavíkar, Nes, Sjóar, Funnings og Eiðis kommunur.
Norðstreymoyar Øki fevnir um Sunda, Kvívíkar og Vestmanna kommunur.
Vága Øki fevnir um Sandavágs, Miðvágs og Sørvágs kommunur.
Tórshavnar øki fevnir um Tórshavnar kommunu.
Sandoyar Øki fevnir um Skopunar, Sands, Skálavíkar, Húsavíkar og Skúvoyar kommunur.
Suðuroyar Øki fevnir um Hvalbiar, Tvøroyrar, Fámjins, Hovs, Porkeris, Vágs og Sumbiar kommunur.

§ 2. Talið á limunum í hvørjari kærunevnd er:
Í Norðoya Øki 7 limir og 7 tiltakslimir.
Í Eysturoyar Øki 7 limir og 7 tiltakslimir.
Í Norðstreymoyar Øki 5 limir og 5 tiltakslimir.
Í Vága Øki 5 limir og 5 tiltakslimir.
Í Tórshavnar Øki 7 limir og 7 tiltakslimir.
Í Sandoyar Øki 5 limir og 5 tiltakslimir.
Í Suðuroyar Øki 7 limir og 7 tiltakslimir.

§ 3. Limirnir í kærunevndunum verða valdir soleiðis millum kommunurnar í økinum:
Í Norðoya Øki velur Klaksvíkar kommuna 4 limir og 4 tiltakslimir. Viðareiðis kommuna 1 lim og 1 tiltakslim. Hvannasunds kommuna 1 lim og 1 tiltakslim. Fugloyar, Svínoyar, Kunoyar og Húsa kommunur 4. hvørt valskeið 1 lim og 1 tiltakslim, soleiðis at 1. valskeið velur Fugloyar kommuna 1 lim og 1 tiltakslim, 2. Svínoyar, 3. Kunoyar og 4. Húsa kommuna.
Í Eysturoyar Øki velur Runavíkar kommuna 1 lim og 1 tiltakslim. Nes kommuna 1 lim og 1 tiltakslim, Fuglafjarðar kommuna 1 lim og 1 tiltakslim, Leirvíkar kommuna 1 lim og 1 tiltakslim, Gøtu kommuna 1 lim og 1 tiltakslim, Sjóar kommuna 1 lim og 1 tiltakslim, Eiðis og Funnings kommunur annað hvørt valskeið ávikavist 1 lim og 1 tiltakslim, soleiðis at fyrsta valskeiðið velur Eiðis kommuna limirnar.
Í Norðstreymoyar Øki velur Vestmanna kommuna 2 limir og 2 tiltakslimir, Kvívíkar kommuna 1 lim og 1 tiltakslim og Sunda kommuna 2 limir og 2 tiltakslimir.
Í Vága Øki velja Sørvágs og Miðvágs kommunur hvør sínar 2 limir og 2 tiltakslimir og Sandavágs kommuna ein lim og ein tiltakslim.
Í Tórshavnar Øki velur Tórshavnar kommuna 7 limir og 7 tiltakslimir.
Í Sandoyar Øki velja Skopunar, Sands, Skálavíkar, Húsavíkar og Skúvoyar kommunur hvør sín lim og tiltakslim.
Í Suðuroyar Øki velja Tvøroyrar og Vágs kommunur hvør sínar 2 limir og 2 tiltakslimir, Hvalbiar og Sumbiar kommunur hvør sín lim og tiltakslim og Porkeris, Fámjins og Hovs kommunur 1 lim og 1 tiltakslim soleiðis at 1. valskeið velur Porkeris kommuna 1 lim og 1 tiltakslim, 2. Fámjins, 3. Porkeris og 4. Hovs kommuna, soleiðis at Porkeris kommuna altíð velur limirnar annað hvørt valskeið.
Stk. 2. Í staðin fyri val eftir stk. 1, kunnu kommunurnar í einum øki avgera at velja allar limirnar í kærunevndina á einum felags fundi millum umboð fyri allar kommunur í økinum. Eitt slíkt val verður bindandi fyri alt valskeið bygdarráðsins.

§ 4. Fyrsti fundur hjá nývaldu nevndini verður í Norðoya Øki fyrireikaður av einum av limunum valdur av Klaksvíkar kommunu. Kommunan ger sjálv av, hvør tað skal verða. Í Eysturoyar Øki fyrireikar valdi limurin hjá Runavíkar kommunu fyrsta fundin, í Norðstreymoyar Øki annar limurin hjá Vestmanna kommunu og ger kommunan sjálv av hvør tað skal verða, í Vága Øki annar limurin hjá Miðvágs kommunu og ger kommunan sjálv av hvør tað skal verða, í Sandoyar Øki limurin hjá Sands kommunu, í Suðuroyar Øki annar limurin hjá Tvøroyrar kommunu og ger kommunan sjálv av hvør tað skal verða og í Tórshavnar Øki ein av limunum valdur av Tórshavnar kommunu. Kommunan ger sjálv av, hvør tað skal verða.

§ 5. Limirnir hava sambært § 151 í skattalógini tagnarskyldu viðvíkjandi øllum, sum fyriferst innannevndar. Hesa somu skyldu hava eisini øll hjálparfólk nevndarinnar.

§ 6. Henda kunngerð kemur í gildi dagin eftir, at hon er kunngjørd, og hevur virknað frá 1. januar 2005. Samstundis fer úr gildi kunngerð nr. 8 frá 5. februar 2001 um val av limum í kommunalu skattakærunevndirnar.

Fíggjarmálaráðið, 21. desember 2004

Bárður Nielsen (sign.)
landsstýrismaður
/ Petur Alberg Lamhauge (sign.)