Leita
Skriva út

Eftirløn hjá tænastumannasettum

Sambært eftirlønarlógini eru tænastumannasett undantikin skylduni at rinda til eftirløn, tí tænastumannaskipanin frammanundan hevur innbygda eftirløn. Hetta merkir, at tá ið tænastumannasett fáa løn, verður einki tikið burturav til eftirløn, eins og gjørt verður við aðrar lønir.

Hvat merkir tað fyri teg sum arbeiðsgevara?

Ítøkiliga merkir tað, at hevur tú tænastumannasett í starvi, skal einki av lønini flytast sum eftirløn.

Summi tænastumannasett fáa eyka eftirløn

Henda eykaløn kann eisini fara ígjøgnum skipanina. Tað er tó krav, at hon verður goldin til føroyskan eftirlønarveitara. Rindar tú sum arbeiðsgevari slíka eyka eftirløn til tænastumannasett, skalt tú á lønarlistanum seta hana í teigin fyri eftirløn.

Eyka eftirløn til danskan eftirlønarveitara

Eyka eftirløn, ið verður rindað til danskan eftirlønarveitara, kann bert rindast av skattaðum peningi. Sum arbeiðsgevari hevur tú tá tveir møguleikar:

  1. antin kanst tú rinda eyka eftirlønina sum vanliga løn til skattingar, og so biðja tann tænastumannasetta rinda eyka eftirlønina til danska eftirlønarveitaran,
  2. ella tú kanst flyta eyka eftirlønina beinleiðis til danska eftirlønarveitaran. Tá skalt tú á lønarlistanum seta fulla lønarupphædd í teigin “A-inntøka” og so draga eyka eftirlønina frá í teiginum “Forvunnin upphædd”. Tá verður eyka eftirlønin skattað, og so kanst tú sum arbeiðsgevari flyta hana til danska eftirlønarveitaran sum vanliga flyting.

Dømi

Tú skalt rinda tænastumannasettum 40.000 kr. í løn. Av teimum skulu 2.500 kr. rindast sum eyka eftirløn til danskan eftirlønarveitara. Teigarnir í lønarlistanum skulu tá útfyllast soleiðis:

  • A-inntøka: 40.000 kr.
  • Forvunnin upphædd: 37.500 kr.
  • Eftirlønargjald: 0 kr.

Snarslóðir