Mvg og firmabilar

Fyri at fáa mvg'ið aftur av einum keyptum bili, skal bilurin burturav brúkast til arbeiðskoyring, tað er til uppgávur hjá arbeiðsplássinum. Eitt nú til fundir, umboðan og innkeyp til virksemi, sum arbeiðsplássið rekur. Verður hann nýttur til privatkoyring, fæst mvg'ið ikki aftur.

Privatkoyring er til dømis, at man koyrir egið rusk á brennistøðina við bilinum, fer á møti við honum, til fótbóltsdyst, koyrir børnini í barnagarð, keypir morgunbreyð til familjuna og hvat sum helst, sum ikki er ein uppgáva hjá arbeiðsplássinum. Hevur man tá fingið mvg'ið av bilinum aftur, skal tað endurrindast til TAKS.

So nógv mvg skal endurrindast

Mvg-tíðin er galdandi í fimm ár eftir at bilurin varð keyptur. Mvg'ið, sum TAKS skal hava aftur, verður roknað eftir, nær bilurin bleiv brúktur til privatkoyring fyrstu ferð hesi fimm árini.

Var tað fyrsta árið, skulu 100 prosent av mvg'num endurrindast. Var tað annað árið, skulu 80 prosent endurrindast. Triðja árið 60%, fjórða 40 og fimta 20.

Dømi: Eitt arbeiðspláss keypir ein bil. Virksemið er nógv, og tørvur er á einum bili til arbeiðskoyring burturav. Arbeiðsplássið søkir um og fær mvg'ið av bilinum aftur. Talan er um 100.000 krónur. Tey fyrstu tvey árini verður bilurin bara brúktur til arbeiðskoyring, men triðja árið verður hann eisini brúktur til privatkloyring. Í hesum føri skal arbeiðsplássið rindað 60%, t.e. 60.000 krónur av mvg'num aftur til TAKS.

Roknast kann ikki hinvegin. Tað er, at bilurin kann ikki brúkast til privatkoyring og so seinni til arbeiðskoyring, til dømis tá ið tvey ár eru farin. Tað fæst einki mvg aftur fyri.

Tá ið tey fimm árini eru farin, kann arbeiðsplássið brúka bilin eftir vild

Arbeiðskoyring ella privatkoyring, einki mvg skal endurrindast til TAKS eftir hetta. Øðrvísi er við hesum, um bilurin er leasaður. Les um tað í partinum Leasaðir bilar.

Mvg'ið fæst altíð aftur fyri raksturin av keyptum bilum

Eitt nú av umvæling, brennievni, dekkskifti og tílíkum, sama um bilurin verður brúktur til arbeiðskoyring ella privatkoyring. Hetta er øðrvísi við leasaðum bilum. Les um tað í partinum Leasaðir bilar.

Mvg'ið av leasaðum bilum fæst aftur eftir somu treytum sum fyri keyptar bilar, tað er, at teir skulu brúkast til arbeiðskoyring burturav.

Tríggir munir eru kortini.

Mvg-afturgjaldið er øðrvísi

Verður ein leasaður bilur brúktur til arbeiðskoyring burturav, og avgerð seinni verður tikin um at brúka hann til privatkoyring, fæst mvg'ið ikki aftur frá tí mánaði, at avgerðin varð tikin.

Farast kann ikki hinvegin. Er ein leasaður bilur fyrst brúktur til privatkoyring, fæst mvg'ið ikki aftur restina av leasing-tíðini.

Dømi: Eitt arbeiðspláss leasar ein bil at brúka til arbeiðskoyring og fær tí mvg'ið av mánaðarligu leasing-rokningini afturgoldið. Í juli árið eftir, at bilurin bleiv leasaður, brúkar stjórin bilin til privatkoyring í sambandi við eitt familjutreff. Frá og við hesum mánaði fær arbeiðsplássið ikki mvg'ið av leasingini afturgoldið, galdandi restina av leasing-tíðini.

Mvg-tíðin fyri leasaðar bilar gongur ongantíð út

Tað er, at treytin fyri at fáa mvg'ið aftur er galdandi so leingi, ið leasingin varar.

Mvg'ið fæst ikki aftur fyri raksturin av leasaðum bilum

Hetta tí at raksturin er við í leasing-gjaldinum.

Mvg'ið fæst altíð aftur av lastbilum yvir 3.500 kg. Tað er, at teir kunnu brúkast til bæði arbeiðskoyring og privatkoyring, uttan at mvg'ið skal rindast aftur. Hetta siga § 16, stk. 1, í mvg-lógini og § 5, stk. 1, í kunngerð um lutfalsligan frádráttarrætt fyri meirvirðisgjald og um javnan av inngangandi avgjaldi av íløgugøgnum.

• Arbeiðskoyring: Koyring, sum hevur samband við virksemi hjá einum arbeiðsplássi.
• Arbeiðsbilur: Firmabilur
• Firmabilur: Bilur, sum ein fyritøka eigur.
• Fríur bilur: Firmabilur, sum kann brúkast ella verður brúktur til privatkoyring.
• Privatkoyring: Koyring, sum ikki hevur samband við virksemi hjá einum arbeiðsplássi.