Arbeiðsgevari kann rinda starvsfólki endurgjald fyri:
- at nýta egnan bil til arbeiðsørindi
- vistarhald í sambandi við ferðing í arbeiðsørindum innanoyggja
- vistarhald í sambandi við ferðing í arbeiðsørindum uttanlands
Niðanfyri verður hetta útgreinað.
Niðast eru yvirskipaðar treytir og dømi í sambandi við ferðing.
At nýta egnan bil til arbeiðsørindi
Tá ið starvsfólk nýtir egnan bil í ørindum fyri arbeiðsgevara, kann arbeiðsgevarin rinda 3,20 kr. í skattafríum endurgjaldi fyri hvønn koyrdan kilometur.
Vistarhald í sambandi við ferðing í arbeiðsørindum innanoyggja
Tá ið starvsfólk ferðast í arbeiðsørindum innanoyggja, og arbeiðsgevarin rindar tí endurgjald fyri tað eftir reglunum hjá tí almenna, er endurgjaldið skattafrítt.
Gjøldini eru hesi:
- Tímapeningur: 15 kr.
- Fullur dagpeningur: 250 kr.
- Náttarviðbót, skjalprógvað við rokning, í mesta lagi: 1.100 kr.
- Náttarviðbót, ikki skjalprógvað: 230 kr.
Tímapeningur og dagpeningur er ætlaður sum gjald fyri máltíðir og smáttaríir.
Hesa reglur galda eisini í sambandi við ferðing í arbeiðsørindum innanoyggja:
- Dagpeningur verður goldin fyri hvørt fult samdøgur, sum tænastuferðin varir. Fyri hvønn byrjaðan tíma eftir hetta verður goldin tímapeningur.
- Fær starvsfólk fríar máltíðir á tænastuferðini, verður dagpeningurin og tímapeningurin minkaður við 30% fyri døgurða og 30% fyri nátturða.
- Byrjar tænastuferð eftir klokkan 7 og endar áðrenn klokkan 19 sama dag, verður ikki goldin tímapeningur.
- Rímiligar útreiðslur til mat o.a. verða endurgoldnar móti skjalprógvi.
- Náttarviðbót verður veitt fyri at hava ligið nátt burtur frá arbeiðsstaði. Ein nátt er 8 tímar.
- Skjalprógvar starvsfólk ikki útreiðslur til hotell ella líknandi, kann arbeiðsgevarin rinda náttarviðbót á 230 kr. fyri hvørja nátt. Náttarviðbót er ikki skattafrí, um arbeiðsgevarin hevur latið starvsfólkinum pláss at liggja nátt.
- Uppgerð og avrokning skulu gerast fyri hvørja ferð sær.
Vistarhald í sambandi við ferðing í arbeiðsørindum uttanlands
Tá ið starvsfólk ferðast í arbeiðsørindum uttanlands, og arbeiðsgevarin rindar tí endurgjald fyri tað eftir reglunum hjá tí almenna, er endurgjaldið skattafrítt.
Almennu gjøldini fyri ferðing uttanlands eru at finna á heimasíðuni hjá lønardeildini hjá Fíggjarmálaráðnum.
Vegleiðing til ferðauppgerð fyri tænastuferðir uttanlands er at finna undir snarslóðum.
Yvirskipaðar treytir í sambandi við ferðing
- Fyri at kunna siga seg ferðast í arbeiðsørindum fyri arbeiðsgevara, skal starvsfólkið vanliga vera í føstum starvi, fáa fasta løn, hava fastan arbeiðsstað og vera burtur aðrastaðni í arbeiðsørindum.
- Fastur arbeiðsstaður er til dømis skrivstova, bygningur, verkstaður ella líknandi – tað er ein staður, har starvsfólkið hevur dagligt tilhald.
- Hevur starvsfólkið skiftandi arbeiðsstaðir og ferðast ímillum, verður tað ikki roknað sum ferðing.
Dømi um skattafríar veitingar í sambandi við ferðing
Dømi 1
Starvsfólk fer á skeið uttanlands. Tað fær ikki løn fyri tað út yvir sínar vanligu føstu løn. Hetta starvsfólk hevur rætt til skattafríar veitingar í form av endurgjaldi fyri tær útreiðslur, sum tað hevur av ferðini í mun til at vera heima, t.e. er fyri ferð, mat og uppihald.
Fekk starvsfólkið løn fyri at fara uttanlands, hevði tað ikki havt rætt til skattafrítt endurgjald, men hevði í staðin havt rætt til samdøgursfrádrátt, um treytirnar annars eru loknar.
Dømi 2
Handverkari fer uttanlands at arbeiða. Hesin hevur ikki rætt til skattafríar veitingar. Hetta er tí, at hann ferðast ikki í arbeiðsørindum frá einum føstum arbeiðsstaði í Føroyum, men hevur fastan arbeiðsstað ella skiftandi arbeiðsstaðir uttanlands. Hetta er sambært § 29, nr. 7, í skattalógini.
Í staðin hevur hann rætt til samdøgursfrádrátt, um hann er uttanlands antin í tveir mánaðir samanhangandi ella í minst 100 dagar í einum 12 mánaða tíðarskeiði.
Dømi 3
Handverkari arbeiðir innanoyggja og hevur skiftandi arbeiðsstaðir. Hesin hevur ikki rætt til skattafríar veitingar, tí at hann hevur ongan fastan arbeiðsstað.
Í staðin hevur hann rætt til ferðastuðul ella stuðul til dupult húsarhald, um hann lýkur treytirnar.