Skattafríar veitingar til starvsfólk

Tænastuferð er ferð hjá starvsfólki í sambandi við arbeiðið. Tað ferðast í arbeiðsørindum og kann tá fáa endurgjald frá arbeiðsgevaranum fyri tað, sum tað rindar fyri ferðaseðlar, mat og uppihald á ferðini. Til tess skal tað vera í føstum starvi, fáa fasta løn og hava ein fastan dagligan arbeiðsstað at koma til í Føroyum, t.d. einhvønn bygning.

Er upphæddin á endurgjaldinum hjá arbeiðsgevaranum hin sama sum hjá tí almenna, er endurgjaldið skattafrítt.

Endurgjaldsupphæddir í sambandi við tænastuferð hjá tí almenna innanlands

• Tímapeningur: 15 kr.
• Fullur dagpeningur: 250 kr.
• Náttarviðbót, skjalprógvað við rokning, í mesta lagi: 1.100 kr.
• Náttarviðbót, ikki skjalprógvað: 230 kr.

Endurgjaldsupphæddir í sambandi við tænastuferð hjá tí almenna uttanlands

Endurgjaldsupphæddir standa í rundskrivi um tænastuferðir uttanlands. Leinkjað verður til skrivið undir snarslóðum her á síðuni. Gev gætur, at skrivið verður javnan dagført. Beinir leinkið til áður galdandi skriv, leita so fram rætt skriv á logir.fo. Skriva "tænastuferðir uttanlands" í gluggan "frítekstur" á logir.fo, klikk á leita, og fram kemur listi, har galdandi skriv stendur á.

Endurgjaldstreytir:

• Dagpeningur verður goldin fyri hvørt fult samdøgur, sum tænastuferðin varir. Fyri hvønn byrjaðan tíma eftir hetta verður goldin tímapeningur.
• Fær starvsfólk fríar máltíðir á tænastuferðini, verður dagpeningurin og tímapeningurin minkaður við 30% fyri døgurða og 30% fyri nátturða.
• Byrjar tænastuferð eftir klokkan 7 og endar áðrenn klokkan 19 sama dag, verður ikki goldin tímapeningur.
• Rímiligar útreiðslur til mat o.a. verða endurgoldnar móti skjalprógvi.
• Náttarviðbót verður veitt fyri at hava ligið nátt burtur frá arbeiðsstaði. Ein nátt er 8 tímar.
• Skjalprógvar starvsfólk ikki útreiðslur til hotell ella líknandi, kann arbeiðsgevarin rinda náttarviðbót á 230 kr. fyri hvørja nátt. Náttarviðbót er ikki skattafrí, um arbeiðsgevarin hevur latið starvsfólkinum pláss at liggja nátt.
• Uppgerð og avrokning skulu gerast fyri hvørja ferð sær.

Dømi um skattafríar endurgjaldsupphæddir

Dømi 1

Starvsfólk fer á skeið uttanlands og fær einki fyri tað uttan sína vanligu løn:

Endurgjaldið til hetta starvsfólk er skattafrítt. So var ikki, um starvsfólkið fekk einhvørja upphædd umframt lønina. Tá hevði tað hinvegin havt rætt til samdøgursfrádrátt.

Dømi 2

Handverkari fer uttanlands at arbeiða:

Endurgjaldið til handverkaran er ikki skattafrítt, tí ferðast verður ikki frá einum føstum dagligum arbeiðsstaði í Føroyum. Rættur kann hinvegin vera til samdøgursfrádrátt, um uppihaldið uttanlands antin varir tveir samanhangandi mánaðir ella minst hundrað dagar út av einum tólv mánaða skeiði.

Dømi 3

Handverkari arbeiðir í Føroyum og hevur skiftandi arbeiðsstaðir:

Endurgjaldið til handverkaran er ikki skattafrítt, tí eingin fastur arbeiðsstaður er. Í staðin kann rættur vera til ferðastuðul ella stuðul til dupult húsarhald.

Gáva frá arbeiðsgevara til starvsfólk í sambandi við serstakt høvi er skattafrí, um keypsupphæddin er undir 1.500 kr. við mvg. Er talan um 25, 30, 40 ella 50 ára starvsdag, er keypsupphæddin henda:

25 ár: 2.000 kr.
30 ár: 3.000 kr.
40 ár: 4.000 kr.
50 ár: 5.000 kr.

Gev gætur

Gáva í reiðum peningi er skattskyldig.

Privata nýtsluvirðið á teldu og tilhoyrandi útbúnaði, sum arbeiðsgevari letur starvfólki at ráða yvir í sambandi við arbeiði, er skattafrítt. Talan er tó framvegis um ogn hjá arbeiðsgevaranum.

Nýtir starvsfólk egnan bil til arbeiðsørindi, kann arbeiðsgevarin rinda 3,20 kr. í skattafríum endurgjaldi fyri hvønn koyrdan kilometur.

Privata nýtsluvirðið á samskifti, sum arbeiðsgevari letur starvsfólki at ráða yvir í sambandi við arbeiði, er skattafrítt.

Hjá persóni, sum ikki hevur bústað í Føroyum

Virðið á fríari ferð og fríum bústaði hjá persóni, sum ikki býr í Føroyum, men sum er í bráðfeingis arbeiðsørindum her, er skattafrítt.

Við bráðfeingis arbeiðsørindi er at skilja arbeiði, sum samanlagt varir styttri enn 180 dagar í einum 12 mánaða tíðarskeiði, sama um persónurin er burtur ímillum ella ikki.

Virðið skal leggjast aftur at lønini. Verður tað trekt frá, er tað ikki skattafrítt.

Hjá persóni, sum hevur bústað í Føroyum

Virðið á fríari ferð millum bústað í Føroyum og arbeiðsstað uttanlands er skattafrítt.

Virðið skal leggjast aftur at lønini. Verður tað trekt frá, er tað ikki skattafrítt.

Best er at seta seg í samband við bókhaldara ella grannskoðara

Til ber eisini at spyrja kundatænastu okkara. Ring 35 26 00 mánadag til hósdag millum 10 og 15 ella send eitt teldubræv til taks@taks.fo. Vit vegleiða fegin.