Fráboðast skal á Vinnuglugganum

Ber av serligum ávum ikki til at nýta Vinnugluggan, kann latast inn við oyðublaðnum "Fráboðan um fríar ágóðar og skattafríar veitingar til starvsfólk". Heinta tað undir oyðubløðum her á síðuni

Innlatingarfreistin er 31. januar árið eftir, at ágóði ella veiting er latin

Starvsfólkið upplýsir samsvarandi á egnu sjálvuppgávu síni um fríar ágóðar og skattafríar veitingar, tað fær frá arbeiðsgevara.

Gáva frá arbeiðsgevara til starvsfólk við serligt høvi er skattafrí, um hon kostar minni enn 1.500 krónur við mvg. Er talan um 25, 30, 40 ella 50 ára starvsdag, kann hon kosta ávikavist 2.000, 3.000, 4.000 og 5.000 krónur við mvg.

Gáva í reiðum peningi er tó altíð skattskyldig.

Privatnýtsla av teldu og tilhoyrandi útbúnaði, sum arbeiðsgevari letur starvsfólki at ráða yvir í arbeiði sínum, er skattafrí.

Útbúnaðurin er tó ogn arbeiðsgevarans.

Privatnýtsla av telefon og tilhoyrandi útbúnaði, sum arbeiðsgevari letur starvsfólki at ráða yvir í arbeiði sínum, er skattafrí.

Útbúnaðurin er tó ogn arbeiðsgevarans.

Ger starvsfólk arbeiðsørindi í egnum bili, kann arbeiðsgevarin rinda 3,20 kr. í skattafríum endurgjaldi fyri hvønn koyrdan kilometur.

Tænastuferð er ferð hjá starvsfólki í sambandi við arbeiði. Er tað á slíkari ferð, kann tað fáa endurgjald frá arbeiðsgevaranum fyri tað, tað rindar fyri ferðaseðlar, mat og uppihald á ferðini. Treytin er, at tað hevur fast starv, fasta løn og fastan dagligan arbeiðsstað at koma til í Føroyum.

Er endurgjaldið tað sama sum hjá tí almenna, er tað skattafrítt

Endurgjaldsupphæddir hjá tí almenna, tá ferðast verður í Føroyum:

• Tímapeningur: 15 kr.
• Fullur dagpeningur: 250 kr.
• Náttarviðbót, skjalprógvað við rokning, í mesta lagi: 1.100 kr.
• Náttarviðbót, ikki skjalprógvað: 230 kr.

Endurgjaldsupphæddir hjá tí almenna, tá ferðast verður uttanlands, standa í rundskrivi um tænastuferðir uttanlands. Gev gætur, at skrivið verður javnan dagført. Beinir leinkið til áður galdandi skriv, leita fram galdandi skriv á logir.fo.

Endurgjaldstreytir

• Dagpeningur verður goldin fyri hvørt fult samdøgur, sum tænastuferðin varir. Fyri hvønn byrjaðan tíma eftir hetta verður goldin tímapeningur.
• Fær starvsfólk fríar máltíðir á tænastuferðini, verður dagpeningurin og tímapeningurin minkaður við 30% fyri døgurða og 30% fyri nátturða.
• Byrjar tænastuferð eftir klokkan 7 og endar áðrenn klokkan 19 sama dag, verður ikki goldin tímapeningur.
• Rímiligar útreiðslur til mat o.a. verða endurgoldnar móti skjalprógvi.
• Náttarviðbót verður veitt fyri at hava ligið nátt burtur frá arbeiðsstaði. Ein nátt er 8 tímar.
• Skjalprógvar starvsfólk ikki útreiðslur til hotell ella líknandi, kann arbeiðsgevarin rinda náttarviðbót á 230 kr. fyri hvørja nátt. Náttarviðbót er ikki skattafrí, um arbeiðsgevarin hevur latið starvsfólkinum pláss at liggja nátt.
• Uppgerð og avrokning skulu gerast fyri hvørja ferð sær.

Dømi um endurgjald – skattafrítt og ikki

Dømi 1: Starvsfólk fer á skeið uttanlands og fær einki fyri tað uttan sína vanligu løn
Endurgjaldið til starvsfólkið er skattafrítt. So var ikki, um tað fekk onkra upphædd umframt lønina. Tá hevði tað hinvegin fingið rætt til samdøgursfrádrátt.

Dømi 2: Handverkari fer uttanlands at arbeiða
Endurgjaldið til handverkaran er ikki skattafrítt, tí hann ferðast ikki frá føstum dagligum arbeiðsstaði í Føroyum. Hann kann hinvegin fáa samdøgursfrádrátt, um uppihaldið uttanlands antin varir tveir samanhangandi mánaðir ella minst hundrað dagar í eitt tólv mánaða skeið.

Dømi 3: Handverkari hevur skiftandi arbeiðsstaðir í Føroyum og ferðast ímillum
Endurgjaldið til handverkaran er ikki skattafrítt, tí eingin fastur arbeiðsstaður er. Handverkarin kann í staðin hava rætt til ferðastuðul ella stuðul til dupult húsarhald.

Hjá persóni, sum býr í Føroyum

Virðið á fríari ferð millum bústað í Føroyum og arbeiðsstað uttanlands er skattafrítt.

Virðið skal leggjast aftur at lønini. Verður tað trekt frá, er tað ikki skattafrítt.

Hjá persóni, sum býr uttanlands

Virðið á fríari ferð og fríum bústaði hjá persóni, sum býr uttanlands, og sum er í bráðfeingis arbeiðsørindum her, er skattafrítt.

Ørindini eru bráðfeingis, um tey samanlagt vara styttri enn 180 dagar í eitt 12 mánaða tíðarskeið, antin tey verða avbrotin ímillum ella ikki.

Virðið skal leggjast aftur at lønini. Verður tað trekt frá, er tað ikki skattafrítt.