Land fyri land-frágreiðing
Sambært lóg skulu ávís fleirtjóða samtaksfeløg í Føroyum árliga lata TAKS eina land fyri land-frágreiðing, har tey til skattaeftirlits greina búskaparliga virksemi sítt farna roknskaparárið. Háttlíka gera samtaksfeløg aðrastaðni fyri sínum skattamyndugleikum.
Á enskum eitur frágreiðingin Country-by-Country Report, stytt CbC Report. Tað er útfyllingarleistur, ásettur OECD.
Tað skulu samtaksfeløg (feløg og fastir rakstrarstaðir), sum eru ultimativ móðurfeløg ella umboðsmóðurfeløg í fleirtjóða samtøkum, og sum hava ein samlaðan umsetning fyri alt samtakið á minst 5,6 milliardir krónur í eitt roknskaparár.
Markið á 5,6 milliardir krónur skal tulkast sambært vegleiðing hjá OECD um gjaldoyrasveiggj. Sí bls. 21 í "Vegleiðing um íverkseting av land fyri land-frágreiðing" undir snarslóðum her á síðuni.
Hevur fleirtjóða samtak fleiri innlatingarskyldig samtaksfeløg í Føroyum, skulu hesi sambært § 118 d, stk. 2, 1. pkt. í skattalógini sínámillum gera av, hvat teirra skal lata inn frágreiðingina. Les meira hesi viðurskifti niðari á síðuni í partinum Fráboðan um innlatingarskyldu.
TAKS skal hava avrit av fulltrú, um triðipersónur letur inn vegna samtaksfelagið.
Undantaksreglan
Hóast samtaksfelag sambært nevndu reglum eigur at lata inn land fyri land-frágreiðing til TAKS, so skal kortini ikki latast inn, um fleirtjóða samtakið samstundis letur inn land fyri land-frágreiðing fyri sama roknskaparár í rættardømi, sum hevur avtalu við Føroyar um útveksling av land fyri land-frágreiðingum.
Tílík útvekslingsavtala kom í gildi í mai 2023, og TAKS hevur hana við fleiri lond. Síggj tey við undir snarslóðum at klikkja á leinkið: Heimasíðan hjá OECD: Virkjaðar avtalur um útveksling av land fyri land-frágreiðing. Komin á síðuna, skriva Faroe Islands í leitigluggan, og londini koma fram.
Sjálva útvekslingsavtaluna sært tú undir leinkinum: Fleirtjóða avtala um útveksling av land fyri land-frágreiðingum.
Samtaksfelagið skal tó altíð lata TAKS fráboðan um innlatingarskyldu
Annars er undantaksreglan ikki galdandi. Les meira um hesa fráboðan niðari í partinum Fráboðan um innlatingarskyldu.
Frágreiðingin skal upplýsa um alt búskaparligt virksemi hjá øllum samtakinum í øllum londum. Til dømis í hvørjum skattligum rættardømum, samtakið hevur virksemi, hvat umsetningurin og vinningurin hava verið, hvat rindað er í skatti, hvussu stór ognin er, hvussu nógv starvsfólk eru, hvat slag av virksemi, samtakið rekur, og hvørjar eindir eru partur av samtakinum.
Alt skal við.
Sama hvat samtaksfelag letur inn land fyri land-frágreiðingina, er tann regla galdandi, at føroysk samtaksfeløg sambært § 118 f, stk. 1, í skattalógini skulu geva TAKS fráboðan um, hvat felag hevur skyldu at lata inn land fyri land-frágreiðing, og í hvørjum rættardømi, tað verður gjørt.
Fráboðanin verður gjørd við at fylla út oyðublaðið Fráboðan um innlatingarskyldu. Heinta tað undir oyðubløðum her á síðuni.
Land fyri land-frágreiðing
Skal sambært § 118 c, stk. 2, í skattalógini latast inn í seinasta lagi 12 mánaðir eftir síðsta dag í tí inntøkuári, sum frágreiðingin er fyri. Send um álítandi postskipan til taks@taks.fo ella lat okkum hana á annan tryggan hátt. Viðmerk: Land fyri land-frágreiðing.
Fráboðan um innlatingarskyldu
Skal sambært § 118 f, stk. 1, latast inn í seinasta lagi áðrenn árslok tað inntøkuárið, sum land fyri land-frágreiðingin fevnir um. Send við teldubrævi til taks@taks.fo ella við vanligum brævi til TAKS, Postboks 2151, 110 Tórshavn.
Tað liggur klárt undir snarslóðum. Útfyllingarleistur til land fyri land-frágreiðing, fráboðan um innlatingarskyldu, útfyllingarvegleiðingar og útvekslingsavtala.
Vegleiðingar og útvekslingsavtala eru á enskum.