Partafeløg, smápartafeløg, kommanditfeløg, sparikassar og lutafeløg, sum hava partapening, inngoldnan innskotspening, ábyrgdarpening ella lutapening, ið er kr. 50.000 ella meiri, umframt vinnurekandi grunnar og tryggingarfeløg og íverksetarafeløg, gjalda av uppgjørdu inntøkunum 18% í skatti. Skatturin verður býttur við 30% sum kommunuskattur og 70% sum landsskattur.

Feløg, grunnar o.o., sum í inntøkuuppgerðini hava hall, kunnu draga hallið frá í kapitalvinningssjálvuppgávuni. Hall kann ikki flytast mótsettan veg.

Er talan um feløg, sum eru samskattað, verður ein felags skattauppgerð latin inn fyri feløgini, sum eru fevnd av samskattingini. Dótturfeløgini skulu tó gera eina sjálvstøðuga uppgerð av teirra skattskyldigu inntøku, men úrslitið verður flutt á samlaðu uppgerðina, sum móðurfelagið letur inn og verður sett í skatt av.

Hall frá tíðini áðrenn samskatting kann tó bert dragast frá í felagsins egna yvirskoti.

Samskatting av feløgum er bert galdandi fyri uppgerð av skattskyldigu inntøkuni og ikki uppgerð av skattskyldigari kapitalvinningsinntøku.

Skatturin hjá partafeløgum, feløgum o.ø. fellur til gjaldingar í trimum gjøldum, 1. oktober, 1. november og 1. desember við gjaldfreist til 20. í mánaðinum.

Um so er, at skatturin ikki verður goldin rættstundis, verður renta roknað við 0,7% fyri hvønn byrjaðan mánað frá rættstundis gjaldsdegnum.

Vísir skattauppgerðin hall, kann hetta verða drigið frá í skattskyldigu inntøkuni fylgjandi árini. Hall kann tó bert flytast fram til frádrátt eitt seinni inntøkuár, í tann mun tað ikki er rúm fyri tí í skattskyldigu inntøkuni eitt undanfarið ár.