Lurta

Vinnusjúkugrunnurin

Vinnusjúkugrunnurin er ein grunnur, sum arbeiðsgevarar rinda til. Endamálið við grunninum er at lata endurgjald til tann, sum fær varandi mein ella missir arbeiðsførleikan orsakað av starvi sínum, og sum lýkur treytirnar fyri at fáa endurgjald. Arbeiðs- og brunaeftirlitið tekur avgerðir í vinnusjúkumálum, og TAKS hevur dagligu umsitingina um hendi.

Hvat er ein vinnusjúka?

Ein vinnusjúka er ein sjúka, sum stavar frá skaðiligum árinum í arbeiði. Har arbeiðsvanlukkur henda brádliga, síggjast vinnusjúkur ofta ikki fyrr enn leingi eftir, at skaðiliga árinið byrjaði. Vinnusjúkur kunnu eisini raka ófødd, um mamman er fyri skaðiligum árinum í arbeiði sínum.

Vinnusjúkur kunnu til dømis stava frá arbeiði, har man lyftir tungt, er í nógvum gangi, arbeiðir við vandamiklum evnum ella ger somu rørslur aftur og aftur. Dømi um vinnusjúkur eru astma, eksem, ovurviðkvæmi, niðursett hoyrn og kronisk pína í beinagrind.

Síggj allar vinnusjúkur í vinnusjúkuskránni

Heinta hana undir snarslóðum her á síðuni.

Arbeiðs- og brunaeftirlitið ger av, um talan er um vinnusjúku

Avgerðin verður tikin út frá tí, at læknaligar og tøkniligar royndir vísa, at sjúkan sannlíkast stavar frá skaðiligum arbeiðsárinum.

Stendur sjúka ikki í vinnusjúkuskránni, kann hon kortini verða viðurkend sum vinnusjúka, um Arbeiðs- og brunaeftirlitið metir, at hon sambært nýggjastu læknafakligu vitanini lýkur treytirnar fyri at vera tað.

Hvussu nógv rindi eg í grunnin sum arbeiðsgevari?

Gjaldið til Vinnusjúkugrunnin er 0,1% av árligu A-inntøkunum, ið tú sum arbeiðsgevari rindar starvsfólkinum. Gjaldið verður goldið saman við barsilsinngjaldinum og verður innkravt við mánaðarligari rokning.

Rokningin verður send á www.minrokning.fo. Har kanst tú eisini fáa gjaldið avgreitt sjálvvirkandi, ella tú stovnar eina gjaldsavtalu við TAKS. Tað lættir um, tí tá verður gjaldið til Vinnusjúkugrunnin flutt sjálvvirkandi av kontu tíni. Vel "Gjaldsavtala hjá virkjum við TAKS" undir snarslóðum og les meira um hetta.

Hvør hevur skyldu til at boða frá vinnusjúku?

Sum arbeiðsgevari hevur tú fráboðanarskylduna.

Er talan um sjálvstøðugt vinnurekandi ella persón, ið roynir at bjarga mannalívi, liggur fráboðanarskyldan hjá tí tryggjaða ella avvarðandi hansara.

Soleiðis verður boðað frá

Boðað verður frá vinnusjúku við at senda eitt umsóknarblað til Arbeiðs- og brunaeftirlitið. Umsóknarblaðið eitur “Fráboðan um vinnusjúku”. Tú finnur tað undir snarslóðum her á síðuni. Til ber eisini at ringja til TAKS og spyrja eftir Vinnusjúkugrunninum á telefon 35 26 00 og fáa umsóknarblaðið sendandi. Telefontíð er mánadag til hósdag frá 10 til 15.

Send umsóknina til

Arbeiðs- og brunaeftirlitið
undir Bryggjubakka 27
100 Tórshavn

Fráboðanarfreist

Fráboðanarfreistin er 9 yrkadagar eftir, at tú sum arbeiðsgevari fært varhugan av, at sjúka kann stava frá arbeiði.

Meira at vita um vinnusjúku?

Ring til Arbeiðs- og brunaeftirlitið á telefon 66 44 00 mánadag til fríggjadag millum 9 og 15 ella send eitt teldubræv til arb@arb.fo.