Innflutningsreglur fyri serliga vøru

Einans Apoteksverkið kann innflyta heilivág til Føroya, eisini heilivág til djór, t.d. seyðamedisin. Verður komið fram á vøru, ið kann vera heilivágur, verður Apoteksverkið tilkallað fyri at staðfesta, um so er. Er talan um heilivág, verður hann latin løgregluni, sum setir seg í samband við móttakaran og avgreiðir málið við hann. TAKS kunnar altíð móttakaran um hetta fyrst.

Er talan um postsending, sum inniheldur aðra lógliga vøru umframt, verður henda vøra útflýggjað, tá ið løgreglan er liðug at viðgera málið. Heilivágurin verður fyribeindur.

Natúrheilivágur og kostískoyti

Natúrheilivágur og kostískoyti verða vanliga ikki roknað sum heilivágur og kunnu sum oftast keypast á netinum. Onkuntíð kunnu ivamál vera, og tá verður vøran afturhildin í tollinum, til eitt umboð frá Apoteksverkinum váttar, at talan ikki er um heilivág. Síðan verður vøran útflýggjað. Tað er altíð Apoteksverkið, sum ger av, um ein vøra er heilivágur ella ikki.

Veska til elektroniskar sigarettir

Veska til elektroniskar sigarettir verður roknað sum heilivágur, um hon inniheldur nikotin, og tá er tað bert Apoteksverkið, sum kann innflyta. Hetta er sambært § 29, stk. 1, í apotekslógini.

Kjøt

Loyvt er at flyta inn kjøt og kjøtvøru beinleiðis úr ES-londum og Noregi uttan veterinerváttan, um bert handilsskjal/faktura fylgir við vøruni.

Loyvt er eisini at flyta inn kjøtvøru beinleiðis úr Íslandi og Nýsælandi, treytað av at veterinerváttan fylgir við, at vøran er framleidd á einum ES-løggildum virki, og at innflutningurin er fráboðaður Heilsufrøðiligu Starvsstovuni.

Kjøtvøra beinleiðis úr øðrum londum skal til veterinert eftirlit hjá Heilsufrøðiligu Starvsstovuni, og starvsstovan skal hava fingið boð um vøruna frammanundan.

Loyvt er at flyta inn smærri nøgd av kjøtvøru til privata nýtslu úr ES, Noregi, Íslandi, Sveis, Liktinstein og Grønlandi. Loyvt er ikki at flyta inn kjøt og kjøtvøru úr øðrum triðjalondum.

Gjølligari upplýsingar um innflutning av kjøti og kjøtvørum og landbúnaðarvørum yvirhøvur fáast frá Heilsufrøðiligu Starvsstovuni.

Fiskur

Loyvt er at flyta inn fisk og fiskavøru beinleiðis úr ES, Noregi, Íslandi, Sveis og Liktinstein uttan veterinerváttan, um bert handilsskjal/faktura fylgir við.

Fiskur og fiskavøra úr øðrum londum skal til veterinert eftirlit hjá Heilsufrøðiligu Starvsstovuni. Harumframt skal Heilsufrøðiliga Starvsstovan hava fingið boð um vøruna frammanundan.

Loyvt er at flyta inn smærri nøgd av fiski og fiskavøru til privata nýtslu úr ES, Noregi, Íslandi, Sveis og Liktinstein og Grønlandi. Loyvt er ikki at flyta inn fisk og fiskavøru úr øðrum triðjalondum.

Í Føroyum hevur síðan 31. desember 2014 ikki verið loyvt at innflyta ella útflyta ozonoyðandi evni. Neyðsynjarvøra, ið inniheldur halónir, er tó undantikin.

Føroysku reglurnar um ozonoyðandi evni byggja á altjóða reglur í ávikavist montreal-protokollini um evni, sum bróta niður ozonlagið, og í anneks VI í marpol-sáttmálanum um luftdálking frá skipum.

Fyrispurningar um ozonoyðandi evni skulu setast Umhvørvisstovuni, sum umsitur økið.

Rúsdrekka

Rúsdrekkasøla landsins hevur einkarætt at flyta inn rúsdrekka til Føroya. Undantikið er vín til altarnýtslu og ein ávís nøgd av rúsdrekka, víni og øli, sum ferðandi til Føroya kunnu flyta inn. Harumframt kann Apoteksverkið flyta inn ethanol til tekniska nýtslu og heilivágsframleiðslu. Rúsdrekka, sum verður innflutt uttan um hesar ásetingar, kann verða afturhildið og burturbeint av TAKS.

Tubbak

Tað er bert loyvt at flyta inn tubbaksvøru til Føroya til vinnuligt endamál og at selja slíka vøru, um hon er merkt við ávaringarteksti um heilsuvandar, ið standast av tubbaksnýtslu. Eisini skal standa á, hvat innihaldið er av tjøruevni, nikotini, kolsýru o.ø.

Veska til elektroniskar sigarettir

Veska til elektroniskar sigarettir verður roknað sum heilivágur, um hon inniheldur nikotin, og tá er tað bert Apoteksverkið, sum kann innflyta. Hetta er sambært § 29, stk. 1, í apotekslógini.

Vápn og fýrverk

Loyvt er ikki at flyta inn vápn og fýrverk uttan við loyvi frá fútanum. Loyvið frá fútanum skal fyriliggja, tá vøran verður innflutt og tollavgreidd. Er einki loyvi, verður vøran afturhildin av TAKS, sum samstundis boðar fútanum frá innflutninginum.

Loyvt er at flyta inn vanligar høglbyrsur og vanligar høglpatrónir.

Ivamál ella fyrispurningar um innflutning av vápnum og fýrverki skulu latast fútanum, sum umsitur lógirnar um vápn og fýrverk.

Spreingievni

Loyvt er ikki at flyta inn spreingievni, spreingiútbúnað o.a. uttan við loyvi frá Arbeiðseftirlitinum.

Loyvið frá Arbeiðseftirlitinum skal fyriliggja, tá vøran verður innflutt og tollavgreidd. Er einki loyvi, verður vøran afturhildin av TAKS, sum samstundis boðar Arbeiðseftirlitinum frá innflutninginum.

Ivamál ella fyrispurningar um innflutning av spreingievni og spreingiútbúnaði skulu setast Arbeiðseftirlitinum, sum umsitur lógina um spreingievni og spreingiarbeiði.