Transittvøra

Vøra, sum verður endurútflutt til annað land

Er talan um slíka vøru, er tað ein treyt, at hon skal flytast út aftur í sama líki og standi, sum hon er innflutt í. Tað merkir, at meðan vøran er á tolløkinum, skal hon ikki pakkast um ella pakkast út. Tað er eisini ein treyt, at vøran skal liggja á goymslu hjá flutningsfelagi ella postavgreiðslu, til hon verður flutt úr aftur Føroyum. Hetta skal í høvuðsheitum verða gjørt í seinasta lagi ein mánað eftir, at hon er komin til landið. Um ikki, er § 18 í tolllógini galdandi.

Heimildin fyri tollfrítøku av hesi vøru er at finna í § 12, stk. 2 í tolllógini. Harumframt er rundskriv nr. 3 frá 1995 eisini galdandi.

Vøra, sum skipum og flogførum tørvar, meðan tey eru stødd á tolløkinum

Við slíkari vøru er tað ein treyt, at hon skal brúkast umborð á skipinum ella flogfarinum, og at skipið ella flogfarið sleppur ikki víðari uttan. Hetta kunnu t.d. vera eykalutir ella annað tílíkt.

Heimildin fyri tollfrítøku av hesi vøru er at finna í § 7, stk. 1, a í tolllógini.

TAKS kann krevja, at tá ið transittvøra verður innflutt, skal tað vera tilskilað á serskildum transittmanifesti, sum sigur frá, nær vøran er innflutt, og við hvørjum flutningsfari. Somuleiðis kann TAKS krevja, at vøra, tá ið hon verður endurútflutt, skal vera tilskilað á serskildum transittmanifesti, sum sigur frá, nær og við hvørjum flutningsfari, hon varð innflutt.

Er talan um vøru at nýta á flogfari ella skipi, skal umboðsmaður ella skipari vátta á farmabrævið, at vøran er móttikin.